(ক)
‘অন্যযুগ’
আলোচনীখনে
তৃতীয় বৰ্ষত ভৰি দিলে৷ তৃতীয় বৰ্ষৰ ৩য় সংখ্যাটো বিহু সংখ্যাৰূপে প্ৰকাশৰ ব্যৱস্থা
কৰা হৈছিল৷ ২৩ মাৰ্চ ২০২০ তাৰিখে ছপাশালত দিবলৈ সাজু কৰা হৈছিল যদিও তলাবদ্ধ (Lockdown)-ৰ বাবে আমি থমকি ৰ’বলগীয়া হ’ল৷ তেনেকৈ মে’ আৰু জুন মাহৰো সম্পূৰ্ণ সাজু
হৈ উঠিল৷ কিন্তু পৰিস্থিতিয়ে সৃষ্টি কৰা সমস্যাক আমি অতিক্ৰম কৰিব নোৱাৰিলোঁ৷
সমস্যা অতিক্ৰম কৰিব পৰাটোৱেই জীৱন৷ সেয়ে ষ্টেনলি আৰ্নল্ডৰ এটা কথালৈ মনত পৰিল৷
আৰ্নল্ডে কৈছিল প্ৰতিটো সমস্যাৰ মাজতেই তাৰ সমাধানৰ বীজটো হেনো ওৰণি লৈ থাকে৷ সেয়ে
‘অন্যযুগ’-ৰ প্ৰকাশনৰ উদ্গাতাসকলৰ লগত পৰামৰ্শ কৰাৰ লগতে আমাৰ
সহৃদয় হৃদয়-সংবাদী পাঠকসকলৰ লগত
আলোচনা কৰি অনলাইন সংস্কৰণ প্ৰকাশৰ সিদ্ধান্ত কৰা হ’ল৷ সেয়ে এপ্ৰিল, মে’ আৰু জুন মাহৰ তিনিওটা সংখ্যা
একেলগে প্ৰকাশ কৰা হৈছে৷ বিজ্ঞান আৰু প্ৰযুক্তিয়ে সমগ্ৰ বিশ্বৰ ব্যৱহাৰিক জীৱনক
একেআাগী ৰূপ দ্ৰুততাৰে দান কৰিছে৷ ইয়াৰ ফলত মানৱ জাতিৰ মানসিকতাও প্ৰায় একাকাৰ হৈ
পৰিছে৷ এনে এক পৰিস্থিতিয়ে বিজ্ঞান, প্ৰযুক্তি আৰু ঐতিহ্যৰ সংমিশ্ৰণৰ পটভূমিত এক নতুন যুগৰ আৰম্ভণি ঘটাইছে৷ নতুন যুগে
কঢ়িয়াই অনা বৌদ্ধিক আৰু ব্যৱহাৰিক সম্পদ গ্ৰহণ কৰিও ‘অন্যযুগ’-এ
ঐতিহ্যৰ
লগত সম্পৰ্ক বিচ্ছিন্ন নকৰে৷ আধুনিক জীৱনৰ সকলো সমল লৈও বিজ্ঞানমনষ্কতাৰে ঐতিহ্যৰ
মৌলিক শক্তিক চিনি পাব পৰা মানসিকতাৰে আধুনিক জীৱন যাপন কৰিবলৈ আধুনিক জীৱন এটা
আমাক লাগে৷ ‘অন্যযুগ’-ৰ লেখাৰ মাজত নতুন যুগৰ
প্ৰতিফলন ঘটিব চিন্তা, কৰ্ম, সাহিত্য, ভাষাৰ মাজত৷ গতিকে ‘অন্যযুগ’ যুগৰ প্ৰতিনিধি হ’ব খোজে৷ সময়ে লৈ অহা সকলো
সমস্যাৰ সমাধান আৰু সময়ে লৈ অহা সকলো প্ৰশ্নৰ উত্তৰ দিব খোজে৷ আমি সম্পূৰ্ণ আধুনিক
হৈও যাতে শুদ্ধ পথেৰে ভাবী কালৰ
সাধকসকলক আগবঢ়াই নিব পাৰোঁ, তাৰ বাবেই এই নতুন সুযোগ আমি গ্ৰহণ কৰিছোঁ৷ যোৰহাটৰ অনুকূল বৌদ্ধিক পৰিৱেশেও
আমাক উৎসাহিত কৰিছে৷
অনলাইন সংস্কৰণসমূহ www.anyayug.com-ত পঢ়িবলৈ পাব৷ Google Play Store-ৰ পৰা ‘অন্যযুগ’ এপ্টি ডাউনল’ড কৰিও পঢ়ুৱৈসকলে আলোচনীখন
পঢ়িব পাৰিব৷
(খ)
ক’ৰনা মহামাৰীয়ে অসমীয়া ভাষাৰ অন্দৰমহলত সোমাই বৰপীৰাত বহা কেইটামান শব্দ
লিখোঁতে বহুতে বেলেগ বেলেগ বানান ব্যৱহাৰ কৰে৷ ‘অন্যযুগ’-এ
বিজ্ঞানসন্মত
বিচাৰেৰে তলত দিয়াৰ দৰে শব্দ ব্যৱহাৰ কৰিব—
ক’ৰনা,
অন্তৰীণ— Quarentine (কোৱাৰেণ্টিন্)
থাৰ্ম’টেষ্ট— (তাপ বা তাপীয় পৰীক্ষা)
ৰেপিড্টেষ্ট— (দ্ৰুত পৰীক্ষা)
ছ’চিয়েল ডিষ্টেঞ্চ— (Social distance) সামাজিক আৰু শাৰীৰিক দূৰত্ব৷
লকডাউন— তলাবদ্ধ
প্লাজমা— (পদাৰ্থ বিজ্ঞানত
পদাৰ্থৰ চতুৰ্থ অৱস্থা, জীৱবিজ্ঞানত তেজৰ
প্ৰায় হালধীয়া তৰল ভাগ, ৰক্তৰস বা প্লাৱিকা)
