এই শিতানত পঠনীয় গ্ৰন্থৰ আভাস দাঙি ধৰিবলৈ প্ৰয়াস কৰা হ’ব। অন্যযুগৰ সম্পাদনা কক্ষই যুগত কৰা এই শিতানত প্ৰকাশৰ উদ্দেশ্যে সদাশয় পাঠকসকলেও নিজৰ পঠন অভিজ্ঞতা সংক্ষেপে লিখি পঠাব পাৰিব। তেনে স্থলত গ্ৰন্থৰ প্ৰচ্ছদৰ স্পষ্ট ফট’গ্ৰাফ, গ্ৰন্থৰ প্ৰকাশ সম্পৰ্কীয় তথ্য আদি পঠাব লাগিব। কোনো লেখক-প্ৰকাশকে তেওঁলোকৰ গ্ৰন্থ সম্পৰ্কে এই শিতানৰ যোগেদি প্ৰকাশ কৰাব খুজিলে গ্ৰন্থৰ কমেও এটা ক’পি তলৰ ই-মেইল ঠিকনালৈ পঠাব লাগিব—
anyayug@gmail.com
তপন দাসৰ গল্পগুচ্ছ
তপন দাস। পাঞ্চজন্য, গুৱাহাটী,
২০১৯
প্ৰসিদ্ধ নাট্যব্যক্তিত্ব তপন
দাসে যোৱা শতিকাৰ নৱম দশকৰ পৰাই গল্প লিখি আহিছে। তপন দাসৰ গল্পগুচ্ছ-ত চৌবিছটা গল্প সংকলিত হৈছে।
তেওঁৰ গল্পত বাস্তৱৰ সঠিক চিত্ৰায়ণ হোৱা বুলি ক’ব পাৰি, বিশেষকৈ চৰিত্ৰ আৰু সেই চৰিত্ৰবোৰৰ মুখৰ ভাষাৰ আধাৰত। অভ্ৰভেদী
কল্পনা, ঘটনাৰ মোৰ সলনিত প্ৰমাণ
কৰা প্ৰত্যুৎপন্নমতিতা, কিছু শিশুসুলভ দুষ্টালি
বিশেষভাৱে লক্ষ্য কৰিবলগীয়া। কিন্তু আটাইতকৈ ডাঙৰ কথা, তপন দাসে যিকোনো গল্প এটা সুন্দৰভাৱে ক’ব জনাটো। নাটকৰ মানুহ হিচাপে অৱধাৰিতভাৱেই
তেওঁৰ গল্পত নাটকীয়তা সৃষ্টি হয়, যি পাঠকক চমৎকৃত কৰে। কিন্তু তেওঁ গল্পকথনত গিমিক সৃষ্টি নকৰে।
তাৰ বিপৰীতে বাস্তৱক সুস্থভাৱে কাৰ্য-কাৰণৰ সূত্ৰইদি অনুধাৱন কৰিবলৈ যত্ন কৰে।
বুদ্ধই হাঁহিছে
বিতোপন বৰবৰা। ভৱানী, গুৱাহাটী,
২০১৩
বিতোপন বৰবৰাই সংখ্যাত খুব কম
গল্প লিখিছে যদিও আধুনিক মানুহৰ মনস্তত্ত্ব অধ্যয়নত তেওঁৰ কম সংখ্যক গল্পই যথেষ্ট প্ৰভাৱশালী
বুলি পৰিগণিত হৈছে। ২০১৩ চনতে প্ৰকাশিত বুদ্ধই হাঁহিছে শীৰ্ষক গল্পগ্ৰন্থত নটা
গল্পত গল্পকাৰৰ পৰ্যৱেক্ষণ ক্ষমতা, বিশ্লেষণ ক্ষমতা, ইতিহাস সম্পৰ্কীয় দৃষ্টিভংগী, আন্তঃৰাষ্ট্ৰীয় ৰাজনৈতিক পৰিপ্ৰেক্ষা
সম্পৰ্কত সজাগতা আৰু সাৱধানী অৱস্থানৰ লগতে দ্ৰুত গতিত গা কৰি উঠা মেট্ৰ’প’লিটান সমাজত সৃষ্টি হোৱা ন ন মানৱীয় সমস্যাৰ সম্পৰ্কেও গল্পকাৰৰ গভীৰ
অনুসন্ধিৎসা প্ৰকাশ পাইছে। বিষয়ৰ অনুগত বৰ্ণনাভংগী বিতোপন বৰবৰাৰ গল্পৰ এটা বিশেষ
আকৰ্ষণ।
চ’তৰ উৰহী
অপূৰ্ব কুমাৰ শইকীয়া। পাঞ্চজন্য, গুৱাহাটী, ২০১৯
চিকিৎসক আৰু চিকিৎসাবিজ্ঞানীসকলে
ৰোগ, ৰোগী আৰু চিকিৎসাৰ সৈতে
জড়িত হওঁতে ৰোগীৰ মনস্তত্ত্ব অধ্যয়নৰ যি সুযোগ লাভ কৰে, তেনে সুযোগ আন ক্ষেত্ৰৰ মানুহৰ
একেবাৰেই কম। আকৌ, নিজৰ জন্মস্থানখনৰ মানুহৰ
মুখৰ কথা-বতৰাৰ ভাষা, সাধুকথা-কিম্বদন্তি, প্ৰাকৃতিক বিবিধতা আৰু সেই প্ৰকৃতিৰ
সৈতে সহমৰ্মিতা, নিজৰ সমাজখনৰ জনগাঁথনিৰ
স্বৰূপ আৰু সিবিলাকৰ সৈতে সম্পৰ্কিত সমস্যা আৰু সম্ভাৱনাখিনি আন্তৰিকতাৰে পৰ্যবেক্ষণ-অধ্যয়ন
কৰা লোকে সাহিত্যচৰ্চাৰ বেলিকা কাহানিও ভাবনা আৰু বিষয়ৰ অভাৱত ভুগিবলগীয়াত নপৰে। আনহাতে, গাঁৱৰ পৰা গৈ মহানগৰৰ জীৱন-প্ৰৱাহৰ
সৈতে মিলি-জুলি সহাৱস্থান কৰিবলগীয়া ব্যক্তিয়ে বহু নতুনত্ব আহৰণ কৰে আৰু আন বহুখিনিৰ
পৰা কাৰ্যতঃ বিচ্ছিন্ন হৈ পৰে, যাৰ ফলত আজীৱন এক ধৰণৰ হাহাকাৰবোধে তেনে ব্যক্তিক শান্তিত থাকিবলৈ
নিদিয়ে। তেনে লোক যদি সৃষ্টিশীল লেখক হয়, তেন্তে লেখাৰ যোগেদিয়ে তেওঁ অতীত-বৰ্তমানৰ মাজত একোডাল সাঁকো
ৰচনা কৰিবলৈ সক্ষম হয়। অপূৰ্ব কুমাৰ শইকীয়াৰ শেহতীয়া গ্ৰন্থ চ’তৰ উৰহীৰ গল্পখিনিতো উক্ত কথাখিনিৰ
প্ৰতিফলন ঘটিছে। পৰিচ্ছন্ন চৰিত্ৰ সৃষ্টি, নিহিত ব্যংগ আৰু সমাজৰ প্ৰতি এক ধৰণৰ দায়িত্ববোধ শইকীয়াৰ গল্পসমূহৰ মাজত
প্ৰকাশ পাইছে।
ঐয়া মোৰ ডিব্ৰু-ছৈখোৱা
নীলাক্ষী চলিহা গগৈ। পূৰ্বাঞ্চল, গুৱাহাটী,
২০২০
অৰণ্য আৰু আৰণ্যক জীৱনক লৈ অসমীয়া
ভাষাত উপন্যাস প্ৰায় নায়েই। ডাঃ নীলাক্ষী চলিহা গগৈয়ে ঐয়া মোৰ ডিব্ৰু-ছৈখোৱা
উপন্যাসত ডিব্ৰু-ছৈখোৱা ৰাষ্ট্ৰীয় উদ্যানৰ বনজ সৌন্দৰ্য আৰু সম্পদৰ লগতে প্ৰখ্যাত বনগাঁও
লাইকা-দধিয়াৰ বাসিন্দাসকলৰ জীৱন চৰ্যাক আন্তৰিকতাৰে পোহৰাই তুলিছে। উপন্যাসখনৰ কাহিনীৰ
গাঁথনি বৰ দৃঢ়পিনদ্ধ নহয় আৰু
সেইটো উপন্যাসখনৰ উল্লেখযোগ্য দিশো নহয়। লাইকা-দধিয়াবাসীৰ গণস্বাস্থ্যৰ বিষয়টোক ঔপন্যাসিকে
এগৰাকী চিকিৎসকৰ চকুৰে লক্ষ্য কৰিছে। অৰণ্যৰ মাজৰ মুক্ত জীৱনবোধৰ সোৱাদ ডাঃ ইৰিণা বৰুৱা
আৰু বকুল বৰাৰ যোগেদি সৃষ্টি কৰা হৈছে। তদুপৰি চোৰাং চিকাৰ, বনৰক্ষীসকলৰ কঠোৰ জীৱন সংগ্ৰাম
আদিও উপন্যাসখনত প্ৰকাশ পাইছে।
কৰ্ণৰ স্বগতোক্তি
দীপিকা শইকীয়া।
পাঞ্চজন্য, গুৱাহাটী, ২০১৭
নৈখন এতিয়া দূৰৈত
আৰুণি কাশ্যপ।
পাঞ্চজন্য, গুৱাহাটী, ২০১৯
হাউচ ৱিথ এ থাউজেণ্ড ষ্ট’ৰিজ শীৰ্ষক উপন্যাসেৰে বিশ্বজোৰা
খ্যাতি অৰ্জন কৰা ঔপন্যাসিক আৰুণি কাশ্যপৰ নৱতম উপন্যাস নৈখন এতিয়া দূৰৈত। অসমৰ এখন
গাঁৱৰ এজন মেধাৱী যুৱক আমেৰিকাৰ বিশ্ববিদ্যালয়ত পঢ়িবলৈ গৈ যিবোৰ ঘটনাৰ মুখামুখী হ’বলগীয়াত পৰিল, কাৰ্যতঃ উপন্যাসখন তাৰেই
ভৰা। কিন্তু গতানুগতিক বৰ্ণনাৰ পৰিৱৰ্তে সামাজিক ভিন্নতাই বিচাৰ-বুদ্ধিৰ ভিন্নতা, ৰুচিবোধকে ধৰি বিভিন্ন দিশত ফুটি
সাংস্কৃতিক ভিন্নতা আদিৰ প্ৰেক্ষিতগতভাৱে ৰাজীৱ নামৰ চৰিত্ৰটোক উপস্থাপন কৰা হৈছে।
ঘটনাচক্ৰত ক্ষত-বিক্ষত
হৈ এটা সময়ত আমেৰিকাত তিষ্ঠিব নোৱাৰি ৰাজীৱে পঢ়া-শুনা আধাতে এৰি অসমলৈ উভতি আহিছে। আমেৰিকাক
পৃথিৱীৰ স্বৰ্গ বুলি সাধাৰণতে বিভিন্ন মাধ্যমৰ যোগেদি তৃতীয় বিশ্বৰ লোকসকলৰ মনত সৃষ্টি
কৰা ধাৰণাটোৰ বিপৰীতে এই উপন্যাসে এজন যুৱকৰ দৃষ্টিৰে প্ৰকৃত আমেৰিকাক আৱিষ্কাৰ কৰিবলৈ
পাঠকক সহায় কৰিব।
শিল্পকলা : ঐতিহ্য আৰু আধুনিকতা
ড° ৰাজকুমাৰ মজিন্দাৰ। এন এল পাব্লিকেশ্যন্ছ, গুৱাহাটী,
২০১৭
নন্ ডিজিটেল্ গল্পবোৰ
নৱজিৎ চেলেং।
আখৰ প্ৰকাশ, গুৱাহাটী, ২০১৯
পকা ধানৰ কিৰীটি
কুশল দত্ত।
পাঞ্চজন্য, গুৱাহাটী, ২০১৯
চকৰীফেঁটী বুৰঞ্জীৰ নজ্বলা অধ্যায়
টুনুজ্যোতি গগৈ। জে এচ পাব্লিকেশ্বন্ছ, গুৱাহাটী, ২০১৯
বুৰঞ্জী শব্দটোৰ সৈতে অসম আৰু
অসমীয়াৰ উশাহ-নিশাহৰ সম্বন্ধ আছে যদিও সাম্প্ৰতিক সময়ত বুৰঞ্জীৰ প্ৰতি আমাৰ আগ্ৰহ ক্ৰমশঃ
টুটি অহা বুলি অনুভৱ হয়। সম্ভৱতঃ এইটো কাৰণতে, নিজৰ শিপা সম্পৰ্কীয় স্পষ্ট ধাৰণা নোহোৱা কাৰণেই বৰ্তমান সময়তো
অসমীয়াই বাৰে বাৰে বঞ্চিত আৰু প্ৰতাৰিত হ’বলগীয়া অৱস্থাত পৰিছে। উদীয়মান লেখক টুনুজ্যোতি গগৈয়ে বুৰঞ্জীৰ
নামত প্ৰচলিত সত্য সম্পৰ্কে নিজৰ অনুসন্ধিৎসাৰ পৰিচয় দি সময়ে সময়ে বহু প্ৰবন্ধ লিখি
আহিছে। তেনে তেৰটা প্ৰবন্ধৰ সংকলন চকৰীফেঁটী বুৰঞ্জীৰ নজ্বলা অধ্যায়। বুৰঞ্জী
অধ্যয়নৰ বেলিকা যিমান পাৰি সিমানলৈ তেওঁ নিৰ্বিকাৰ হৈ বস্তুনিষ্ঠ দৃষ্টিভংগী পোষণ কৰিবলৈ যত্ন কৰিছে।
একে সময়তে সমকালীন সমাজত গা কৰি উঠা বিভিন্ন কেৰোণৰ ঐতিহাসিক প্ৰেক্ষাপট বিচাৰ কৰিবলৈও
তেওঁ যত্নপৰ হৈছে। প্ৰকাশ পোৱাৰ দুমাহৰ ভিতৰতে দ্বিতীয় সংস্কৰণ ওলোৱা পুথিখনে ইতিমধ্যে
তিনিটা সংস্কৰণৰ ৰূপত প্ৰকাশ লাভ কৰিছে।
তেজত গজা দুপৰীয়াটো
নিবিড় অনুৰাগ মানস। নক্সা, ধেমাজি-ডিব্ৰুগড়, ২০১৭
সংবেদনা আৰু যুক্তিশীলতা নিবিড়
অনুৰাগ মানসৰ কাব্যচেতনাৰ প্ৰধান দিশ। তেওঁ নিজে এজন চিত্ৰশিল্পীও। প্ৰকৃতি আৰু মানুহৰ
সম্পৰ্কৰ নিবিড়তা, ইতিহাস অনুসন্ধান, মূৰ্ত-বিমূৰ্তৰ মাজত সম্পৰ্কবোধ
আৰু গ্ৰাম্য প্ৰকৃতিনিৰ্ভৰ পটভূমিত নিজৰ অস্তিত্ববোধ তেওঁৰ কাব্যসৃষ্টিৰ অনুপ্ৰেৰণাত
ক্ৰিয়াশীল। সাতত্ৰিছটা কবিতাৰে সমৃদ্ধ তেজত গজা দুপৰীয়াটো-ৰ কবিতাখিনি ভাগ কৰা হৈছে
চাৰিটা থূলত— ক্ৰমে পিতাই আৰু পুৱতি নিশাৰ কথকতা, মাতষাৰ কঁপোতে, নিজক বিচাৰি নাপাই ঘূৰি আহোঁতে আৰু তেজত গজা দুপৰীয়াটোৰ
সৈতে বুলি। প্ৰখ্যাত শিল্পী পৰেশ ভূঞা আাৰু হোমেন শইকীয়াৰ ৰেখাঙ্কনেৰে সমৃদ্ধ অকণমান
কিতাপখনৰ কবিতাখিনি পঢ়িবলগীয়া। নান্দনিক ৰূপত সজ্জিত কিতাপখনৰ মাজত এজন প্ৰতিশ্ৰুতিৱান
কবিৰ অস্তিত্ব বিদ্যমান।
