হৰেকৃষ্ণ ডেকা
(১) ৰাম
আপোনাৰ ৰাম আৰু বাপুৰ ৰাম
যদি একেজন হয়,
মই বাপুৰ ৰামক ৰাম বুলি ক’ম
আৰু আপোনাৰ ৰামক আপোনৰাম বুলি ক’ম৷
বাপুৰ ৰাম হৃদয়ত থাকে
আৰু মৰ্যাদা-পুৰুষোত্তম হৈ বিৰাজ ক’ৰে৷
আপোনৰাম ওঁঠেৰে বাগৰে আৰু
যন্ত্ৰেৰে ৰজনজনাই যায়৷
আপোনৰাম আপোনাৰ পতাকা হয়৷
মচনদৰ খুঁটি গধুৰ কৰিবলৈ অৰ্চিত হয়৷
কেতিয়াবা যদি আপোনৰাম ওঁঠত থাকোঁতে
মচনদৰ খুটি ল’ৰি যায়,
সেই খুটি মজবুত কৰিবলৈ আপোনৰামৰ
আশিস আপুনি নাপায়৷
তেওঁ ওঁঠত গধুৰ, নামিব নোৱাৰে৷
বাপুৰ ৰামে ৰহিমৰ সতে’
হৃদয়ে হৃদয়ে বাগৰি যায়-
ৰঘুপতি ৰাঘৱ ৰাজা ৰাম৷
ঈশ্বৰ আল্লা তোমাৰে নাম৷
(২) ভোগালী
শূন্য পথাৰখনত বতাহে হাবাথুৰি খাই কি বিচাৰিছে?
শস্য চপোৱা হ’ল৷ গুটিধানবোৰ ভঁৰালত৷
আউল-বাউল বতাহৰ বিননিত শুই থকা নৰাবোৰে
চক খাই উঠি মূৰ তুলি চাইছে৷ বতাহৰ চকুপানী
নিয়ৰ টোপাল হৈ সৰিছে আৰু নৰাবোৰ সেমেকা হৈ পৰিছে৷
বতাহৰ মুখত হাঁহি দিবলৈ মেজিটো জ্বলাই
হৈ-ধ্বনি দিয়াঁহি৷ দোকমোকালিৰ বেলিলৈ চাই কোৱাঁহি,
অহাবাৰো আমাৰ পথাৰ যেন ধানেৰে সোণালী কৰাঁ৷
এই ভোগালিতে,
দিহিঙে-দিপাঙে
পথাৰে-পথাৰে
মেজিৰ সেক লৈ,
সেৱাটি জনাই,
গঞা-জ্ঞাতি এক হোৱাঁ৷
(৩) ৩১ ডিচেম্বৰ
কাইলৈ ফেঁহুজালি ফালি
উভতি আহিলে
বেলিটো বেলেগ হৈ আহিব নেকি ?
দোকমোকালি বেলিটো ওলালে কওঁ
এটা নতুন দিন ৷
কাইলৈ ক’ম নতুন বছৰ ৷
এটা পুৰণি বেলি
এটা পুৰণি জোন
এখন পুৰণি পৃথিৱী ৷
কিন্তু প্রতিটো দিনেই নতুন দিন ৷
প্রতিটো বছৰেই নতুন বছৰ ৷
যদিও কেৱল নির্ভৰ ভৰ,
নহলে সকলো শূন্য,
ক’ৰবাত এটা ঈশ্বৰ-কণাই
কিবা কৌতুক কৰি আছে ৷ আৰু সেয়েই
পৃথিৱী ঘূৰি আছে,
পুৰণি হৈও নতুন হৈ আছে ৷
---
টোকা :
ভৰ- mass
ঈশ্বৰ-কণা- Higgs-Boson particle, যি অন্য কণাক ভৰ দিয়ে৷
