কবিতা

অনুভৱ তুলসী

 

ৰন্ধন গেছৰ চিলিণ্ডাৰৰ দামতকৈ

জোনলৈ যোৱা বাছৰ ভাড়া কম

তথাপি সকলো বাছ খালী

জোনত ভোটকেন্দ্ৰ হেনো নাইকীয়া

ৰাজআলি আছে গাঁত-টালিও আছে

টোলগেটৰ সাধু শুনিবলৈ

গাড়ীবোৰে ঢাপলি মেলিছে

 

তুমি যাদুকৰ দৃশ্যমানকো কৰাঁ অদৃশ্য

মৌনতা ফেৰী কৰি ফুৰাঁ

দাঁতে-ওঁঠে অণ্ঠে-কণ্ঠে

সুৰা কিনোতাই বেচোঁতাক কৰসেৱা কৰে

খাওঁতাৰ মুখৰ গন্ধ তুমিয়েই জোখাঁ

আৰু জোখাঁ জৰিমনাৰ পৰিমাণ

হাটে-বজাৰে বেচা-কিনা বিনিময়

প্ৰাপ্তবয়স্ক নিজকে পাৰি নেকি বেচিব

পানীকেঁচুৱা কিনোতাৰহে হেতা-ওপৰা

 

এইফালে কিবা এটা আহি থকা যেন লাগিছে

এক সমদল হ’ব পাৰে শ্ল’গান মুখৰ

বাটৰ বেণ্ডপাৰ্টিত ভঙা-পতাৰ বাজনা

চহৰৰ এইটো বাটত শাওনৰ মেঘৰ ঘৰ

এইটো বাটত পাইপৰ  পানীহিলৈ প্ৰসৱ

এইটো বাটত ওজা আৰু পালিৰ কনভয়

 

চন্তৰীৰ গুলীত সিকি-আধলি ঢলি পৰে

পুৱাৰ কাগজত গৰম-চেঁচা আখৈ উভৈনদী

আখৰ বাখৰ নীৰৱ বাঙ্ময় বতাহৰ অতপালি

নেজ নথকা এই পদ্যই পাৰ পায় যদি ...

 

পূৰ্বৱৰ্তী পৃষ্ঠা পৰৱৰ্তী পৃষ্ঠা

PRINT