উদয় কুমাৰ বৰুৱা
অৱশেষত
পানীপটাৰ শিলটোৰ অবিৰত প্ৰাৰ্থনাত কণামেঘৰ টোপনি ভাগিল
লগেলগে বাউলি এজাক বতাহৰ পিছে পিছে মুষলধাৰ বৰষুণ
কণামেঘে দেখা নাই আগচোতালৰ ন-কৈ ফুলা নেমুজোপা, কিম্বা অজ্ঞাত,নেমুজোপাই
লালন কৰা গোপন সপোনটোৰ কথাও
নামহীন অত্ৰানি এটাই
হঠাৎ জোকাৰি গ’ল তাৰ সমস্ত শৰীৰ
জানোচা সপোনটো...
তেতিয়াই, হয় তেতিয়াই একাঁঠু বিষাদত ডুবি কণামেঘৰ স্বগতোক্তি :
“শিলবোৰ কেৱল শিলেই নহয়
নদীৰ দৰে শিলৰো থাকে আত্মা
প্ৰেমহীনতাতো বৈ থাকে নীৰৱে
অনন্য স্বৰ হৈ”
